Монголын Хуульчдын холбооны Тамгын газрын дарга Ц.Ганболдоор ахлуулсан ажлын хэсэг 2018 оны дөрөвдүгээр сарын 20, 21-ний өдрүүдэд Дархан-Уул аймагт ажиллалаа.
Ажлын хэсэг нь Монголын Хуульчдын холбооны үйл ажиллагааг таниулах, шинээр батлагдсан хууль тогтоомжийг сурталчлах, хуульчийн үргэлжилсэн сургалт зохион байгуулах зорилготойгоор орон нутагт ажилласан бөгөөд орон нутгийн хуульчдаас санал болгосон сэдэвт тулгуурлан сургагч багшийг сонгож, хуульчийн үргэлжилсэн сургалтын 3 багц цаг олгох сургалт явуулж байна. Тодруулбал, Хуульчдын холбооны гишүүн хуульч Ц.Азбаяр “Хуульчийн хөгжил”, “Хуульчийн харилцаа, хандлага” сэдвээр, Монголын Хуульчдын холбооны гишүүн, хуульч, судлаач Б.Эрдэнэбилэг “Эрүүгийн хэрэг хянан шийдвэрлэх тухай хуулийн үзэл баримтлал” сэдвээр, Хуульчдын холбооны гишүүн хуульч Б.Өнөмөнх “Гадаадын иргэний эрх зүйн байдал болон тулгамдаж буй асуудал” сэдвээр, Монголын Хуульчдын холбооны Мэргэжлийн хариуцлагын хорооны Ажлын албаны дарга Т.Ганбаатар “Хуульчдын холбооны Мэргэжлийн хариуцлагын хорооны үйл ажиллагаа-танилцуулга, мэдээлэл” сэдвээр тус тус хичээл заасан бөгөөд сургалтад Дархан-Уул аймагт хуульчийн мэргэжлийн үйл ажиллагаа явуулж буй 60 гаруй хуульч хамрагдсан юм. Мөн ажлын хэсэг нь Дархан-Уул аймгийн хуульчдын дунд Хуульчийн эрх зүйн байдлын тухай хуулийн шинэчилсэн найруулгын төслийн хэлэлцүүлэг зохион байгуулсан. Тус хэлэлцүүлгийг Хуульчдын холбооны Тамгын газрын дэд дарга Ш.Жолбарс удирдан явуулсан бөгөөд хуульчид олон үнэтэй саналыг уламжилж байлаа.
Хуульчдын холбоо нь хуульчийн нийтэд тустай мэргэжлийн үйл ажиллагаа эрхлэх, төлбөрийн чадваргүй иргэнд хууль зүйн туслалцаа үзүүлэх чиг үүргийнхээ хүрээнд Дархан-Уул аймгийн иргэдэд хууль зүйн үнэ төлбөргүй зөвлөгөө өгөх ажлыг Хууль зүйн туслалцааны төвтэй хамтран зохион байгуулсан. Түүнчлэн Хуульчдын холбооны Ерөнхийлөгчийн тушаалаар Дархан-Уул аймаг дахь Иргэний хэргийн давж заалдах шатны шүүхийн шүүгч Лувсандашийн Амарсанаа, Аймгийн ерөнхий прокурорын орлогч прокурор Халзангийн Баярмаа, Цагдаагийн газрын дарга Хаш-Эрдэнийн Алтанхуяг, хуульч Тэнгисийн Тамирболд нарыг Монголын Хуульчдын холбооны “Хүндэт тэмдэг”-ээр шагнасныг гардуулан өгсөн. Мөн тус аймаг дахь салбарын зохицуулагч Ж.Эрдэнэбаатарт Хуульчдын холбооны тугийг гардууллаа.
