Монголын Хуульчдын холбоо нь хуульчдын хувь хүний хөгжил, харилцаа, хандлага, ёс зүй болон менежментийг шинэ шатанд гаргахад чиглэгдсэн хуульчийн үргэлжилсэн сургалт, хөгжлийн хөтөлбөрүүдийг хамтран хэрэгжүүлэх зорилгоор “Хан голомт” консалтингтай хамтран ажиллахаар боллоо.
Хамтын ажиллагааны санамж бичиг үзэглэх ажиллагаа 2018.05.24-нд болж, Монголын Хуульчдын холбооны Тамгын газрын дэд дарга Ш.Жолбарс, "Хан голомт" консалтингийн захирал Ц.Азбаяр нар гарын үсэг зурж баталгаажууллаа.
Талууд сургалт хөгжлийн хөтөлбөрийг дэмжих, үр дүнг бататгах хамтарсан уулзалт, ярилцлага, хэлэлцүүлэг зохион байгуулах, Улаанбаатар хот, 21 аймаг дахь хуульчдад хамтарсан сургалт зохион байгуулж, хөгжлийн хөтөлбөрийг хүргэх, хэрэгжүүлэх, мэдээлэл солилцох, харилцан туслах, мэргэжил арга зүйн зөвлөгөө өгөх зэргээр хамтран ажиллахаар боллоо.
