Монголын Хуульчдын холбооны Тамгын газрын дэд дарга Ш.Жолбарсаар ахлуулсан ажлын хэсэг 2018 оны тавдугаар сарын 28, 29-ний өдрүүдэд Өмнөговь аймагт ажиллалаа.

    Ажлын хэсэг нь Монголын Хуульчдын холбооны үйл ажиллагааг таниулах, шинээр батлагдсан хууль тогтоомжийг сурталчлах, хуульчийн үргэлжилсэн сургалт зохион байгуулах зорилготойгоор орон нутагт ажилласан бөгөөд орон нутгийн хуульчдаас санал болгосон сэдэвт тулгуурлан сургагч багшийг сонгож, хуульчийн үргэлжилсэн сургалтын 3 багц цаг олгох сургалт явууллаа. Тодруулбал, Хуульчдын холбооны Захиргааны эрх зүйн хорооны удирдах зөвлөлийн гишүүн Н.Мягмар “Төрийн албаны тухай хуулийн шинэчилсэн найруулга” сэдвээр, Захиргааны хэргийн давж заалдах шатны шүүхийн шүүгч С.Мөнхжаргал “Захиргааны хэрэг хянан шийдвэрлэх ажиллагаа” сэдвээр, “Хан голомт” төвийн захирал, хуульч Ц.Азбаяр “Хуульчийн харилцаа, хандлага” сэдвээр  тус тус хичээл заасан. Мөн Монголын Хуульчдын холбооны Мэргэжлийн хариуцлагын хорооны Ажлын албаны дарга Т.Ганбаатар Хуульчдын холбооны Мэргэжлийн хариуцлагын хорооны үйл ажиллагааны талаар танилцуулга, мэдээлэл хийлээ. Тус сургалтад Өмнөговь аймагт хуульчийн мэргэжлийн үйл ажиллагаа явуулж буй 35 хуульч хамрагдсан юм. 

    Хуульчдын холбооны Ерөнхийлөгчийн тушаалаар Өмнөговь аймаг дахь Эрүүгийн хэргийн шатны шүүхийн шүүгч З.Төмөрхүү, аймгийн Прокурорын газрын хяналтын прокурор Д.Мөнхтуяа,  өмгөөлөгч И.Олонмөнх, нотариатч Н.Хандмаа нарыг Монголын Хуульчдын холбооны “Хүндэт тэмдэг”-ээр шагнасныг Тамгын газрын дэд дарга Ш.Жолбарс, Мэргэжлийн хариуцлагын хорооны Ажлын албаны дарга Т.Ганбаатар нар гардуулан өгсөн. Мөн тус аймаг дахь салбарын зохицуулагч Э.Дөлгөөнд Хуульчдын холбооны тугийг гардууллаа.