Монголын Хуульчдын холбооны Ерөнхийлөгч Ж.Хунан Бүгд Найрамдах Социалист Вьетнам Улсаас Монгол Улсад суугаа Элчин сайд Доан Тхи Хыөнгийг 2018 оны зургаадугаар сарын 12-ны өдөр хүлээн авч уулзлаа.
Уулзалтын үеэр Элчин сайд хатагтай Доан Тхи Хыөнг Вьетнам Улсын Хуульчдын нийгэмлэг нь Монголын Хуульчдын холбоотой хамтран ажиллах саналтай байгааг уламжилсан бөгөөд хамтын ажиллагааны хүрээнд хоёр улсын хуульчид харилцан туршлага солилцох, хуульчдын давтан сургалтыг хамтран зохион байгуулах боломжуудын талаар ярилцлаа.
Мөн Элчин сайд Доан Тхи Хыөнг нь Монголын Хуульчдын холбооноос санаачлан хэрэгжүүлж буй "Хил хязгааргүй хууль зүйн туслалцаа" төслийг дэмжихээ илэрхийлсэн бөгөөд 2019 онд тохиох Монгол Улс, Бүгд Найрамдах Социалист Вьетнам Улсын хооронд дипломат харилцаа тогтоосны 65 жилийн ойн хүрээнд хоёр улсын хууль зүйн шинжлэх ухааны салбар, хуульчдын хамтын ажиллагааг сайжруулахад хамтран ажиллах талаар санал солилцсон юм.
Сонирхуулахад, Вьетнам Улсын Хуульчдын нийгэмлэг нь 2009 онд байгуулагдсан, Вьетнам Улсын 62 мужид салбартай, нийт 12000 хуульч гишүүнтэй байгууллага юм.
