Монголын Хуульчдын холбооноос хоёр дахь жилдээ “Хуульчдын форум”-ыг 2018 оны зургадугаар сарын 19-нд “Корпорейт конвеншн центр”-т зохион байгууллаа.
“Хуульчдын форум”-ыг нийгэм, иргэдийн амьдралд тулгамдаж буй асуудлууд, тэдгээрийн хууль зүйн зохицуулалтыг мэргэжлийн түвшинд хэлэлцүүлж, санал, зөвлөмж гаргах, хуульчдын дуу хоолойг нийгэм болон бодлого тодорхойлогчдод хүргэх, хуульчдын нийгмийн хариуцлагыг дээшлүүлэх зорилготойгоор зохион байгуулдаг уламжлал тогтоод байгаа бөгөөд энэ жил “Тогтвортой хөгжлийн зорилтууд-Хуульчдын оролцоо” уриан дор явагдлаа.
Улс орны хөгжил, нийгэм эдийн засгийн байдал, иргэдийн амьжиргаа нь төрийн тогтвортой бодлого, үйл ажиллагаанаас хамаарч, оновчтой эрх зүйн зохицуулалтыг шаарддаг. Харин тогтвортой, аливаа хийдэл, доголдолгүй эрх зүйн орчин нь хуульчдын идэвхтэй оролцооноос хамаарах билээ. Тийм ч учраас “Хуульчдын форум”-ын салбар хуралдаан, хэлэлцүүлгүүд НҮБ-аас дэвшүүлсэн тогтвортой хөгжлийн зорилтуудад хүрэх Монгол Улсын Засгийн газрын үйл ажиллагаанд дэмжлэг болохуйц байсан гэдгийг илтгэгчид онцолж байсан. Тодруулбал, форумын үндсэн хуралдааныг “Үндсэн хуулийн эрх зүй ба цаашдын чиг хандлага” гэсэн сэдвээр явуулсан бол “Хараат бус шүүх ба хууль дээдлэх ёс”, “Хуульчийн ёс зүй ба хариуцлага”, “Хүний эрх ба цахим ертөнц”, “Эрүүгийн хууль тогтоомжийн хэрэгжилт, тулгамдаж буй асуудал”, “Үндэстэн дамнасан хууль зүйн туслалцаа”, “Чанартай хууль зүйн боловсрол: магадлан итгэмжлэл ба үргэлжилсэн сургалт”, “Хөрөнгийн ба санхүүгийн зах зээлийн эрх зүйн хөгжил”, “Хариуцлагатай уул уурхай - Нөхөн сэргээх асуудал” гэсэн найман салбар хуралдааныг зохион байгууллаа.
Хараат бус, шударга шүүхтэй, ёс зүй, хариуцлага өндөр хуульчидтай, эрхээ бүрэн дүүрэн эдэлдэг, чинээлэг дундаж амьдралтай иргэдтэй, хүний эрх болон байгаль орчны тэнцэлд нийцсэн эдийн засгийн болон тогтвортой хөгжлийг Монгол Улсын иргэн бүхэн хүсч буй. Иймд Монголын Хуульчдын холбоо дээрх сэдвүүдийг сонгон, нийт хуульчдынхаа төлөөллөөр хэлэлцүүлж, тодорхой гарц шийдлийг эрэлхийлсэн бөгөөд “Хуульчдын форум”-д оролцогчдоос гаргасан санал санаачилга тус бүрийг нэгтгэн зөвлөмж гаргалаа. Энэхүү зөвлөмжийг хууль тогтоогч, шийдвэр гаргагч нарт хүргүүлэх юм.
“Хуульчдын Форум-2018”-ын сонирхолтой нэг хэсэг нь Эдийн засагч, нийтлэлч Д.Жаргалсайханы Гадаад явдлын сайд асан Ц.Гомбосүрэн гуайтай өрнүүлсэн ярилцлага байсны зэрэгцээ хууль зүйн салбарт нэр хүндтэй, тухайн чиглэлээрээ мэргэшсэн хуульч, эрдэмтэд илтгэгчээр оролцсон нь форумын ач холбогдолыг нэмэгдүүлсэн юм. Тухайлбал, МУИС-ийн Хууль зүйн сургуулийн профессор, хууль зүйн шинжлэх ухааны доктор Ц.Сарантуяа, Үндсэн хуулийн цэцийн гишүүн Д.Ганзориг, Захиргааны хэргийн давж заалдах шатны шүүхийн шүүгч, хууль зүйн доктор Ц.Цогт, МУИС-ийн Хууль зүйн сургуулийн эрдэмтэн нарийн бичгийн дарга, дэд профессор, хууль зүйн шинжлэх ухааны доктор А.Бямбажаргал, МУИС-ийн Хууль зүйн сургуулийн профессор, хууль зүйн доктор Д.Баярсайхан, дэд профессор, хууль зүйн доктор Д.Гангабаатар, хууль зүйн доктор Б.Гүнбилэг нарын 40 гаруй хуульч, эрдэмтэд энэ удаагийн форумын илтгэгч, хэлэлцүүлэгчээр оролцсон.
Мөн шүүгч, прокурор, өмгөөлөгч, бусад хуульчдын төлөөлөл болсон 400 гаруй хуульч оролцсоны зэрэгцээ Гадаад улсын Элчин сайд, элчин сайдын яам, олон улсын хөгжлийн байгууллагын төлөөлөл оролцож өөрсдийн туршлагаасаа хуваалцсан. Түүнчлэн энэ жилийн форумд орон нутгийн хуульчид өргөн бүрэлдэхүүнтэй буюу 21 аймгаас 50 гаруй хуульч оролцсоноороо онцлог боллоо.
“Хуульчдын форум-2018”-ыг зохион байгуулахад дэмжлэг үзүүлсэн Азийн сан, Нээлттэй нийгэм форум, Доче веллэ академи, Чимид сан, Глоб интернэшнл төрийн бус байгууллага, Хуульчдын нийгэмлэг, Олон улсын шилжилт хөдөлгөөний байгууллага, Монголын Үндэсний худалдаа аж үйлдвэрийн танхимын дэргэдэх Арбитр, “Ананд адвокатс”, “И Эл Си”, “Анта партнерс”, “Дачэн дентос”, “Жалайрчо” зэрэг өмгөөллийн нөхөрлөл, байгууллагын хамт олонд талархал илэрхийлье!
