Монголын Хэвлэл мэдээллийн зөвлөл, ХБНГУ-ын "Дойче веллэ" академи, Монголын Хуульчдын холбоо хамтран хэвлэл мэдээллийн эрх зүйн чиглэлээр мэргэшиж буй, мэргэшин ажиллах сонирхолтой хуульчдад зориулан "Хэвлэл мэдээлэл өөрийгөө зохицуулах эрх зүйн боломж бий юу?"  сэдэвт семинарыг 2018 оны зургадугаар сарын 20-нд зохион байгууллаа.

    Семинарыг ХБНГУ-ын Хэвлэлийн зөвлөл, "Дойче веллэ" академийн сургагч багш Манфред Протце удирдан явуулсан бөгөөд "Хэвлэл мэдээлэл, сэтгүүл зүйн нийгэмд гүйцэтгэх үүрэг, өөрийгөө зохицуулах эрх зүйн ач холбогдол", "Хэвлэл мэдээллийг хуулиар зохицуулах, өөрийгөө зохицуулах тогтолцооны ялгаа, олон улсын туршлага, Монгол Улсын эрх зүйн зохицуулалт", "Монгол Улсад хэвлэл мэдээлэл өөрийгөө зохицуулдаг болох дараагийн алхам" зэрэг сэдвээр хуульчдад мэдээлэл өгсөн.

    Сургагч багш Манфред Протце нь Германы хэвлэлийн агентлагийн сэтгүүлч, мэдээний редактор, Германы Хэвлэлийн Зөвлөлийн гишүүнээр ажиллаж байсан бөгөөд тэрбээр DW академи болон бусад байгууллагуудын урилгаар гадаад улсууд болох Египет, Армен, Албани, Азербайджан, Босни-Герцеговина, Болгар, Грек, Киргиз, Козово, Кроац, Мянмар, Австри, Румын, Серби, Унгар зэрэг орнуудад хэвлэл мэдээллийн хэрэгслийн өөрийн зохицуулалтын талаар илтгэл тавьж, сургалт, семинаруудыг хийж байсан туршлагатай юм.