Иргэний эрх зүйн хороо нь орон нутагт ажиллаж, амьдарч буй хуульчдын ур чадвар, дадлага туршлагыг дээшлүүлэх, тэдэнд шинэ мэдлэг, мэдээлэл хүргэх, орон нутгийн иргэдэд иргэний эрх зүйн чиглэлээр зөвлөгөө мэдээлэл өгөх, Монголын Хуульчдын холбоо болон Иргэний эрх зүйн хорооны үйл ажиллагааг сурталчлах, хандивын үйл ажиллагаа зохион байгуулах зорилгоор жил бүр орон нутагт ажилладаг уламжлалтай.

    Энэ уламжлалын дагуу Иргэний эрх зүйн хорооны Тэргүүн, Удирдах зөвлөлийн гишүүд 2018 оны зургадугаар сарын 22-ны өдөр Орхон аймагт ажиллаж “Орхон -2018” өдөрлөг зохион байгууллаа.

    Тус өдөрлөгийн үеэр хуульчдад зориулсан иргэний эрх зүйн сургалтыг МУИС-ийн Хууль зүйн сургуулийн Хувийн эрх зүйн багш Л.Банзрагч “Гэрээний улмаас учирсан хохирол арилгах онол, арга зүйн асуудал” сэдвээр, иргэний эрх зүйн судлаач Э.Нямбаатар ““Хуулийн хүчин төгөлдөр болсон шийдвэрийн талаар  дээд шатны шүүхэд гомдол гаргах хориг ба ИХШХШтХ 166.4” сэдвээр тус тус зохион байгуулж, иргэний эрх зүйн ном, товхимолыг хямдралтай үнээр худалдааллаа. Мөн Монголын Үндэсний Худалдаа, Аж Үйлдвэрийн Танхимын Орхон аймаг дахь салбар зөвлөлтэй хамтран 20 гаруй бизнес эрхлэгчид Иргэний эрх зүйн хорооны удирдах зөвлөлийн гишүүн, хуульч Г.Цолмонгэрэл “Гэрээ байгуулахад анхаарах асуудал” сэдвээр, Иргэний эрх зүйн хорооны удирдах зөвлөлийн гишүүн, хуульч Ж.Ариунаа “Хөдөлмөрийн тухай хууль” сэдвээр тус тус хичээл заасан.

    Үүний зэрэгцээ Иргэний эрх зүйн хорооны удирдах зөвлөлийн гишүүд болон хорооны гишүүн, хуульчдын хандиваар Орхон аймаг дахь саажилттай хүүхдийн “Сорхугтани” төвд хөргөгч авч өгөн сайн үйлс бүтээлээ.