Монголын Хуульчдын холбооны Тамгын газрын дэд дарга Ш.Жолбарсаар ахлуулсан ажлын хэсэг 2018 оны зургадугаар сарын 25, 26-ны өдрүүдэд Орхон аймагт ажиллалаа.

    Ажлын хэсэг нь Монголын Хуульчдын холбооны үйл ажиллагааг таниулах, хуульчийн үргэлжилсэн сургалт зохион байгуулах зорилготойгоор орон нутагт ажилласан бөгөөд орон нутгийн хуульчдаас санал болгосон сэдэвт тулгуурлан сургагч багшийг сонгож, хуульчийн үргэлжилсэн сургалтын 3 багц цаг олгох сургалт явуулсан. Тодруулбал, Захиргааны хэргийн анхан шатны шүүхийн шүүгч Д.Халиуна “Захиргааны хэрэг хянан шийдвэрлэх ажиллагаа” сэдвээр,  Монголын Хуульчдын холбооны гишүүн, анагаах ухааны доктор, хууль зүйн магистр М.Цэрэнбат “Шүүх ДНХ”, “Хүн амын эрүүл мэндийн эсрэг гэмт хэрэг” сэдвээр, “Хан голомт” төвийн захирал, хуульч Ц.Азбаяр “Хуульчийн харилцаа, хандлага” сэдвээр  тус тус хичээл заасан. Сургалтад Орхон, Булган аймагт хуульчийн мэргэжлийн үйл ажиллагаа явуулж буй 70 орчим хуульч хамрагдсан юм. 

   Энэ үеэр Хуульчдын холбооны Ерөнхийлөгчийн тушаалаар Орхон аймаг дахь Эрүүгийн хэргийн анхан шатны шүүхийн шүүгч Ш.Эрдэнэцэцэг, аймгийн Прокурорын газрын хяналтын прокурор Ч.Сэлэнгэ,  өмгөөлөгч Д.Оюунчимэг, аймгийн тойргийн нотариатч Б.Байгаль, Булган аймаг дахь Эрүү, иргэний хэргийн давж заалдах шатны шүүхийн Ерөнхий шүүгч Ё.Бямбацэрэн, Шүүхийн Тамгын газрын дарга П.Хишигдаваа, аймгийн Прокурорын газрын хяналтын прокурор Ц.Сувдаа, Салбарын зохицуулагч, өмгөөлөгч М.Даваасүрэн нарыг  Монголын Хуульчдын холбооны “Хүндэт тэмдэг”-ээр шагнасныг Тамгын газрын дэд дарга Ш.Жолбарс гардуулан өгсөн.

    Мөн Булган аймгийн салбарын зохицуулагч, өмгөөлөгч М.Даваасүрэн, Орхон аймгийн салбарын зохицуулагч, өмгөөлөгч Д.Наранхүү нарт Хуульчдын холбооны тугийг гардуулан өглөө.