Монголын Хуульчдын холбоо нь хуульч, өмгөөлөгчдөд цогц мэдлэг, ур чадвар олгох асуудалд онцгойлон анхаарч, урт болон богино хугацааны мэргэшүүлэх сургалтуудыг тогтмол зохион байгуулж байна. Өнгөрсөн хугацаанд Хэвлэл мэдээллийн эрх зүй, Хөдөлмөрийн эрх зүй, эдийн засгийн гэмт хэрэгтэй тэмцэх чиглэлээр хуульчдыг мэргэшүүлж, чадваржуулах сургалтуудыг амжилттай эхлүүлээд байгаа билээ.
Энэ удаа хуульч, өмгөөлөгчдөд хүүхдийн эрхийг хамгаалах чиглэлээр стратегийн өмгөөлөл явуулах мэдлэг, ур чадвар олгох сургалтыг Нээлттэй нийгэм форум, “Хөгжлийн академи” ТББ-тай хамтран эхлүүллээ.
“Стратегийн өмгөөлөл: Бэлгийн хүчирхийлэлд өртсөн хүүхдийн эрхийг хамгаалах нь” сэдвийн хүрээнд явагдсан тус сургалтыг “Хөгжлийн академи” ТББ-ын үүсгэн байгуулагч Б.Баттуул, Нээлттэй нийгэм форумын менежер Д.Эрдэнэчимэг, Хүчирхийллийн эсрэг үндэсний төвийн хуульч Н.Арвинтариа нар удирдан явуулсан бөгөөд хүүхдийн эрхийг хамгаалах чиглэлээр хуульчийн мэргэжлийн үйл ажиллагаа явуулж буй 10 хуульч хамрагдсан.
Сургалтад хамрагдсан эдгээр хуульч нь эхний шатны сургалтаас стратегийн өмгөөллийн талаарх ойлголт болон олон улсын жишиг, хүүхдийн эсрэг хүчингийн гэмт хэргийг өмгөөлөх явцад тулгарч буй бэрхшээлийн талаар мэдээлэл олж авсан бөгөөд дараагийн шатны сургалтуудаас стратегийн өмгөөллийн хэрэг, сэтгэл санааны хохирол барагдуулах, кейс менежментийн үйлчилгээ, хүүхдийн эсрэг хүчингийн гэмт хэргийн нотлох баримт бүрдүүлэхэд анхаарах асуудлын талаар мэдлэгтэй болох юм.
