Монголын Хуульчдын холбооны Тамгын газрын дэд дарга Ш.Жолбарсаар ахлуулсан ажлын хэсэг 2018 оны есдүгээр сарын 07, 08-ны өдрүүдэд Говь-Алтай аймагт ажиллалаа.

    Ажлын хэсэг нь Монголын Хуульчдын холбооны үйл ажиллагааг таниулах, хуульчийн үргэлжилсэн сургалт зохион байгуулах зорилготойгоор орон нутагт ажилласан бөгөөд орон нутгийн хуульчдаас санал болгосон сэдэвт тулгуурлан сургагч багшийг сонгож, хуульчийн үргэлжилсэн сургалтын 3 багц цаг олгох сургалт зохион байгуулж буй юм. Тодруулбал, Говь-Алтай аймаг дахь Захиргааны хэргийн анхан шатны шүүхийн шүүгч Э.Золбадрах “Захиргааны хэрэг хянан шийдвэрлэх ажиллагааны зарим зохицуулалт” сэдвээр, УЕПГ-ын Сургалт, судалгааны төвийн хяналтын прокурор Г.Оюунболд “Зөрчлийн тухай хууль”, “Зөрчил шалган шийдвэрлэх тухай хууль” сэдвээр, “Хан голомт” группийн захирал, хуульч Ц.Азбаяр “Хуульчийн харилцаа, хандлага”, “Хуульчийн ёс зүй” сэдвээр  тус тус хичээл заасан. Сургалтад Говь-Алтай аймагт хуульчийн мэргэжлийн үйл ажиллагаа явуулж буй 35 хуульч хамрагдсан юм.

    Энэ үеэр Хуульчдын холбооны Ерөнхийлөгчийн тушаалаар Говь-Алтай аймаг дахь Эрүү, Иргэний хэргийн давж заалдах шатны шүүхийн шүүгч Төмөрпүрэвийн Жаргалсайхан, аймгийн Ерөнхий прокурор Биндэръяагийн Ганбаатар, өмгөөлөгч Мягманжавын Энхзаяа, хуульч Сүхбаатарын Сайнбаяр, хуульч Минрагчаагийн Жаргалсайхан нарыг Монголын Хуульчдын холбооны “Хүндэт тэмдэг”-ээр шагнасныг Тамгын газрын дэд дарга Ш.Жолбарс гардуулан өгсөн. Мөн Говь-Алтай аймгийн салбарын зохицуулагч, өмгөөлөгч Ж.Дорждэрэмд Хуульчдын холбооны тугийг гардуулан өглөө.