Монголын Хуульчдын холбооны Тамгын газрын дэд дарга Ш.Жолбарсаар ахлуулсан ажлын хэсэг 2018 оны есдүгээр сарын 12, 13-ны өдрүүдэд Баян-Өлгий аймагт ажиллалаа.

    Ажлын хэсэг нь Монголын Хуульчдын холбооны үйл ажиллагааг таниулах, хуульчийн үргэлжилсэн сургалт зохион байгуулах зорилготойгоор орон нутагт ажиллаж байгаа бөгөөд орон нутгийн хуульчдаас санал болгосон сэдэвт тулгуурлан сургагч багшийг сонгож, хуульчийн үргэлжилсэн сургалтын 3 багц цаг олгох сургалт зохион байгуулсан. Тодруулбал, Нийслэлийн захиргааны хэргийн анхан шатны шүүхийн шүүгч Д.Халиуна “Захиргааны хэрэг хянан шийдвэрлэх ажиллагааны зарим зохицуулалт” сэдвээр, УЕПГ-ын Сургалт, судалгааны төвийн хяналтын прокурор Г.Оюунболд “Зөрчлийн тухай хууль”, “Зөрчил шалган шийдвэрлэх тухай хууль” сэдвээр, “Хан голомт” группийн захирал, хуульч Ц.Азбаяр “Хуульчийн харилцаа, хандлага”, “Хуульчийн ёс зүй” сэдвээр, Мэргэжлийн хариуцлагын хорооны Ажлын албаны дарга Т.Ганбаатар "Хуульчийн мэргэжлийн хариуцлага" сэдвээр  тус тус хичээл заасан юм. Сургалтад Баян-Өлгий аймагт хуульчийн мэргэжлийн үйл ажиллагаа явуулж буй 50 хуульч хамрагдлаа.

    Энэ үеэр Хуульчдын холбооны Ерөнхийлөгчийн тушаалаар Баян-Өлгий аймгийн Эрүү, иргэний хэргийн давж заалдах шатны шүүхийн Ерөнхий шүүгч Солтанмуратын Өмирбек, аймгийн Прокурорын газрын орлогч прокурор Авжатын Турдыбек, өмгөөлөгч Тумысханы Костёр, хуульч Аралханы Еркегүл нарыг Монголын Хуульчдын холбооны “Хүндэт тэмдэг”-ээр шагнасныг Тамгын газрын дэд дарга Ш.Жолбарс гардуулан өгсөн. Мөн Баян-Өлгийн аймгийн салбарын зохицуулагч, өмгөөлөгч Б.Раушанд Хуульчдын холбооны тугийг гардуулан өглөө.