Азийн хөгжлийн банкны санхүүжилтээр зохион байгуулдаг эдийн засгийн гэмт хэргийн чиглэлээр хуульчдыг мэргэшүүлэх ээлжит сургалт 2018 оны есдүгээр сарын 17-30-ны өдрүүдэд боллоо.
Эдийн засгийн гэмт хэргийг хянан шийдвэрлэхэд бүх оролцогчдын чадвар, мэдлэг чухал тул Монголын Хуульчдын холбооноос сургалтад шүүгч, прокуроруудаас гадна өмгөөлөгчдийг хамруулах хүсэлт тавьсны дагуу тус сургалтад Хуульчдын холбооны гишүүн 10 өмгөөлөгч хамрагдсан.
Сургалтыг Улсын Ерөнхий прокурорын газар, Цагдаагийн Ерөнхий газар, Шүүхийн шинжилгээний үндэсний хүрээлэн зэрэг байгууллагын энэ чиглэлээр мэргэшсэн хуульч, багш нар удирдан явуулсан бөгөөд сургалтад хамрагдсан хуульчдад эдийн засгийн гэмт хэргийг шалгахад прокурор, мөрдөн байцаагч хэрхэн оролцдог болоод шүүхийн шинжилгээ, санхүүгийн дүн шинжилгээг хэрхэн хийх талаар мэдээлэл өгсөн. Мөн эдийн засгийн гэмт хэргийн талаарх Монгол Улсын хууль, эрх зүйн зохицуулалт болон хуулийн этгээдэд эрүүгийн хариуцлага хүлээлгэх, татвараас зайлсхийх асуудлын талаар туршлага хуваалцсан юм.
Сургалтад оролцогчдын зүгээс сургалтын чанар, үр өгөөж сайн байсныг онцолж байсан бөгөөд сертификат гардан авсан эдгээр хуульч нь эдийн засгийн гэмт хэргийн чиглэлээр Хуульчийн үргэлжилсэн сургалт болон бусад сургалт, семинарт сургагч багшаар ажиллах юм.
