Улсын Их хурлын даргын ахлах зөвлөх, хууль зүйн доктор, Монголын Хуульчдын холбооны Ерөнхийлөгч асан Б.Гүнбилэгээр ахлуулсан ажлын хэсэг 2018 оны 11 дүгээр сарын 02,  03-ны өдрүүдэд Өвөрхангай аймагт ажиллалаа.

    Ажлын хэсэг нь Монголын Хуульчдын холбооны үйл ажиллагааг таниулах, хуульчийн үргэлжилсэн сургалт зохион байгуулах зорилготойгоор орон нутагт ажиллаж байгаа бөгөөд хуульчийн үргэлжилсэн сургалтын 3 багц цаг олгох сургалтыг зохион байгууллаа. Тодруулбал, Хууль зүйн доктор Б.Гүнбилэг “Үндсэн хуулийн эрх зүй”, “Олон улсын хүмүүнлэгийн эрх зүй” сэдвээр, Нийслэлийн Захиргааны хэргийн анхан шатны шүүхийн шүүгч Д.Халиуна “Захиргааны эрх зүйн зарим зохицуулалт” сэдвээр, “Хан голомт” консалтингийн захирал Ц.Азбаяр “Хуульчийн харилцаа, хандлага, ёс зүй” ”сэдвээр  тус тус хичээл заасан. Сургалтад Өвөрхангай аймагт хуульчийн мэргэжлийн үйл ажиллагаа явуулж буй 40 гаруй хуульч хамрагдсан юм.

    Энэ үеэр ажлын хэсэг нь Хуульчдын холбооны Ерөнхийлөгчийн тушаалаар Өвөрхангай аймаг дахь Захиргааны хэргийн анхан шатны шүүхийн Ерөнхий шүүгч Ц.Нэргүй, аймгийн прокурор Ш.Дамдинбазар, өмгөөлөгч, салбарын зохицуулагч Б.Батсайхан, Засаг даргын Тамгын газрын Хууль эрх зүйн хэлтсийн  дарга А.Отгонцэцэг нарыг Монголын Хуульчдын холбооны “Хүндэт тэмдэг”-ээр шагнасныг гардуулан өглөө. Мөн Хуульчдын холбооны Өвөрхангай аймаг дахь салбарын зохицуулагч Б.Батсайханд Хуульчдын холбооны тугийг гардуулан өгсөн юм.

    Түүнчлэн ажлын хэсэг нь Хууль зүйн туслалцааны төвтэй хамтран Өвөрхангай аймгийн иргэдэд хууль зүйн үнэ төлбөргүй зөвлөгөө өгөх өдөрлөгийг зохион байгуулсан.