Монголын Хуульчдын холбооны Иргэний эрх зүйн хороо нь Иргэний эрх зүйн эрдэмтдэд хүндэтгэл үзүүлэх ёслолын ажиллагааг 2018 оны 11 дүгээр сарын 23-ны өдөр зохион байгууллаа.

    Тодруулбал, Монгол Улсын гавьяат багш, хууль зүйн шинжлэх ухааны доктор, профессор Л.Баасан, Хууль зүйн доктор, профессор Т.Мөнхжаргал нарын иргэний эрх зүйн салбарт оруулсан хувь нэмрийг нь өндрөөр үнэлж, Иргэний эрх зүйн хорооны “Хүндэт гишүүн”-ээр өргөмжилж, үнэ бүхий зүйлээр шагнаж, урамшуулсан юм. Эрдэмтдийн зүгээс энэхүү арга хэмжээг санаачлан зохион байгуулж буйд талархаж байгаагаа илэрхийлэхийн зэрэгцээ хойч үедээ өөрсдийн дурсамжийг хуваалцаж, үнэтэй сургаалаа хайрласан.

    Мөн тус арга хэмжээний үеэр Иргэний эрх зүйн хорооны гишүүн, “Отгонтэнгэр” их сургуулийн багш, доктор, дэд профессор М.Сувд “Хойч үеийн байгаль орчны талаарх эрхийг хамгаалах асуудал” сэдвээр,  Иргэний эрх зүйн хорооны удирдах зөвлөлийн гишүүн, доктор С.Энхбаяр “Иргэний хэрэг шүүхэд хянан шийдвэрлэх ажиллагааны талуудын зарчим ба шүүхийн оролцоо” сэдвээр тус илтгэл хэлэлцүүлсэн бөгөөд энэхүү үйл ажиллагаанд нийт 80 гаруй өмгөөлөгч, залуу хуульч, оюутнууд оролцсон.

    Иргэний эрх зүйн хороо нь цаашид энэхүү үйл ажиллагааг уламжлал болгон зохион байгуулах бөгөөд энэ нь хувийн эрх зүйн чиглэлээр эрдмийн зэрэг хамгаалсан эрдэмтдийг алдаршуулах, эрдэмтэн судлаачдад түшиглэн, тэдний саналыг хорооны үйл ажиллагаанд тусгах, хамтран ажиллах, хувийн эрх зүйн чиглэлийн эрдэм шинжилгээний судалгааны ажлыг хөхиүлэн дэмжих зорилготой юм.