Монголын Хуульчдын холбоо нь 2017 оны дөрөвдүгээр сарын 18-нд Нээлттэй нийгэм форум хамтын ажиллагааны санамж бичиг байгуулж,  хуульчийн нийтэд тустай үйл ажиллагааг хөхиүлэн дэмжих, хуульчдын чадавхыг сайжруулах зэрэг хамтран ажиллахаар тохиролцсон билээ.

    Хамтын ажиллагааны хүрээнд Монголын Хуульчдын холбооны Ерөнхийлөгч Ж.Хунан өнөөдөр Нээлттэй нийгэм форумын төлөөлөлтэй уулзалт хийлээ. Уулзалтад Нээлттэй нийгэм форум Засаглалын хөтөлбөрийн менежер Б.Хишигсайхан, Монголын Хуульчдын холбооны Хуульчийн үргэлжилсэн сургалтын асуудал эрхэлсэн хорооны дарга Ц.Батболд, Хууль зүйн сургуулийг магадлан итгэмжлэх хорооны дарга О.Мөнхсайхан нар оролцсон юм.

    Уулзалтын үр дүнд Хуульчийн үргэлжилсэн болон албан бус сургалтын тогтолцоог сайжруулах, сургалтын чанарыг нэмэгдүүлэх, сургалтын шинэ хэлбэрийг нэвтрүүлэх, зохион байгуулалтыг уян хатан болгох, хуульчдын хэрэгцээ шаардлагад нийцүүлэн эрүүгийн эрх зүйн чиглэлээр сургалтын хөтөлбөр боловсруулах, иргэдийн эрх зүйн чадавх, боловсролыг дээшлүүлэх, хуульчийн нийтэд тустай үйл ажиллагааг хөхиүлэн дэмжих зэрэг ажлыг хэрэгжүүлэх хүрээнд Нээлттэй нийгэм форумаас Монголын Хуульчдын холбоонд 38.200.000 төгрөгийн тэтгэлэг олгохоор боллоо.  

    Мөн тус уулзалтаар тэтгэлгийн хүрээнд 2019 онд хэрэгжүүлэх ажлын төлөвлөгөөг хэлэлцэж, эхний аудио, видео сургалтыг хуульчдын заавал судлах хичээл буюу хүний эрх, хуульчийн ёс зүй, Үндсэн хуулийн эрх зүйн хичээлээр бэлтгэн хүргэхээр тохиролцлоо.