Хүний эрхийг хамгаалах, нийгэмд шударга ёсыг тогтоох хүндтэй үүргээ нэр төртэй гүйцэтгэж яваа хуульчдыг шинэ оны босгон дээр шагнаж, урамшууллаа.

    Шагнал гардуулах ёслолын ажиллагаа өнөөдөр “Хуульчдын танхим”-д болсон бөгөөд Монголын Хуульчдын холбооны Ерөнхийлөгч Ж.Хунан, Тамгын газрын дарга Ц.Ганболд, Мэргэжлийн хариуцлагын хорооны Ажлын албаны дарга Т.Ганбаатар нар оролцож, шагнагдсан хуульчдад баяр хүргэж, цаашдын их үйлсэд нь өндөр амжилтыг хүссэн.

    Тодруулбал, Монгол Улсад хүний эрх, эрх чөлөө, шударга ёсыг хамгаалах, хуульчийн нэр хүндийг өндөрт өргөх үүргээ нэр төртэйгээр биелүүлж, Хууль зүйн салбар болон Хуульчдын холбооны хөгжилд оруулсан хувь нэмрийг нь өндрөөр үнэлж, Монголын Хуульчдын холбооны Ерөнхийлөгчийн тушаалаар Монгол Улсын шинжлэх ухааны гавьяат зүтгэлтэн, Хууль зүйн шинжлэх ухааны доктор, профессор, академич С.Нарангэрэл, Улсын дээд шүүхийн шүүгч, Хуульчдын холбооны Зөвлөлийн гишүүн Д.Эрдэнэбалсүрэн, Улсын Ерөнхий прокурорын туслах прокурор, Тамгын газрын дарга, Хуульчдын холбооны Зөвлөлийн гишүүн Ц.Арвинбуудай, Хуульчдын холбооны Зөвлөлийн гишүүн, Үндсэн хуулийн эрх зүйн хорооны тэргүүн В.Удвал, Хуульчдын холбооны Зөвлөлийн гишүүн, өмгөөлөгч Л.Ононбаяр, Хуульчдын холбооны гишүүн, “Дачэн дентонс” хуулийн фирмийн Монгол дахь гүйцэтгэх захирал Д.Нандинцэцэг, Хуульчдын холбооны гишүүн, “Ананд адвокатс” ХХН-ийн үүсгэн байгуулагч партнер Б.Батзаяа, “Ананд адвокатс” ХХН-ийн гүйцэтгэх захирал Н.Энхцэцэг, ахлах хуульч Ү.Амарбат, Л.Ундрам нарыг Монголын Хуульчдын холбооны “Хүндэт тэмдэг”-ээр шагналаа. Мөн Монголын Хуульчдын гишүүн хуульч Э.Энхболдыг Хууль зүй, дотоод хэргийн сайдын тушаалаар “Хүндэт жуух бичиг”-ээр шагнасныг гардуулан өгсөн юм.