Монголын Хуульчдын холбооны гишүүн, Баян-Өлгий аймаг дахь Эрүү, иргэний хэргийн давж заалдах шатны шүүхийн ерөнхий шүүгч С.Өмирбекийн санаачилгаар тус аймгийн хуульчид Т.Ахтаны нэрэмжит аймгийн Нийтийн төв номын санд 254 ширхэг хууль зүйн ном, гарын авлага, эрдэм шинжилгээний сэтгүүл, судалгааны тайланг хүлээлгэн өгчээ. Тус ажил нь номын санд шинээр хууль зүйн номын фонд байгуулахад дэмжлэг үзүүлэх зорилготой бөгөөд дээрх номуудыг тус аймгийн  53 хуульч хувиасаа хандивласан байна.

    Ном хандивлах үйл ажиллагааны үеэр тус аймгийн хуульчид хуульч хүний нийтийн, нийгмийн тусын тулд явуулдаг үйл ажиллагааны нэг төрөл нь иргэдийн эрх зүйн боловсролыг дэмжих явдал гэдгийг онцолж шинээр байгуулагдсан хууль зүйн номын фондыг улам баяжуулах ажилд хуульчид үргэлжлүүлэн дэмжлэг үзүүлэхээ уламжиллаа.

     Баян-Өлгий аймгийн аймгийн Нийтийн төв номын сан 1948 онд үүсгэн байгуулагдаж, 1989 онд улсын хоёрдугаар зэрэглэлийн номын сангийн эрхтэй болсон аж. Гэвч  сүүлийн жилүүдэд номын сангийн хууль зүйн чиглэлийн номын фонд шинэчлэгдээгүй тул орчин үеийн шинэ бүтээлүүдээр баяжуулах, номын фондыг шинээр бий болгох саналыг тус байгууллагын захирал Д.Алтынгүл, уншлагын танхимын эрхлэгч Т.Күлзима нараас хуульчдад гаргасныг Монголын Хуульчдын холбооны Баян-Өлгий аймаг дахь салбар ийнхүү биелүүлжээ.  

Эх сурвалж: www.montsame.mn