Сүүлийн жилүүдэд манай иргэд гадаадад гэмт хэрэгт холбогдох, тэр дундаа хулгайн хэрэг үйлдэх тохиолдол нэмэгдэж байгаа бөгөөд энэ нь Монгол Улсын нэр хүндэд сөргөөр нөлөөлж  буй.

  Манай улсын иргэдийн гадаадад зорчих нөхцөл хүндрэх нөхцөл үүсч байгаатай холбогдуулан Гадаад харилцааны яамны Консулын газар дотоодын холбогдох байгууллагуудтай хамтарсан зөвлөгөөнийг 2019 оны дөрөвдүгээр сарын 19-ний өдөр зохион байгууллаа. Энэхүү зөвлөгөөнд Хууль зүй, дотоод хэргийн яам, Улсын ерөнхий прокурорын газар, Хүний эрхийн үндэсний комисс, Гэмт хэргээс урьдчилан сэргийлэх ажлыг зохицуулах зөвлөл, Хил хамгаалах ерөнхий газар, Цагдаагийн ерөнхий газар, Улсын бүртгэлийн ерөнхий газар, Монголын Хуульчдын холбооны төлөөлөл оролцов.

   Тэд монгол иргэд гадаадад зорчих хугацаандаа үйлдэж буй гэмт хэргийг бууруулах, урьдчилан сэргийлэх, гэмт хэрэг, зөрчилд холбогдсон иргэд гадаадад зорчих нөхцөлийг хязгаарлах, тэдгээрт паспорт олгоход тавигдах шаардлагыг нэмэгдүүлэх боломж зэрэг сэдвээр санал солилцов.

   Зөвлөгөөний үр дүнд дотоодын холбогдох байгууллагуудын ажлын уялдааг бэхжүүлэх, хууль тогтоомжийн хүрээнд хэрэгжүүлэх боломжтой арга хэмжээг тодорхойлж, хамтран ажиллахаар тогтлоо.

                                                                                                                                                                                                                      ЭХ СУРВАЛЖ: ГАДААД ХАРИЛЦААНЫ ЯАМНЫ КОНСУЛЫН ГАЗАР