Монголын Хуульчдын холбооноос 2019 оны 12 дугаар сарын 24-ний үдэш “Фемида-2019” шилдэг хуульч шалгаруулах ёслолын ажиллагааг зохион байгуулж, өнгөрч буй онд амжилт бүтээлээрээ бусдыгаа манлайлсан шилдэг хуульчдыг тодрууллаа.
Ёслолын ажиллагаанд Монголын Хуульчдын холбооны Ерөнхийлөгч Б.Өнөмөнх, Хуульчдын холбооны анхны ерөнхийлөгч Д.Батсүх болон “Чимид” сан, Нээлттэй нийгэм форум, Азийн сан зэрэг байгууллагын зочид төлөөлөгчид, Хуульчдын холбооны Зөвлөлийн гишүүн, Хороодын дарга, тэргүүн нарын төлөөлөл оролцож, шилдэг хуульчдад шагнал гардуулж баяр хүргэсэн юм.
Монголын Хуульчдын холбооны 2019 шилдэг хуульчаар дараах хуульчид шалгарлаа.
Шилдэг шүүгч: Хуульчдын холбооны Зөвлөлийн гишүүн, Сүхбаатар дүүргийн Иргэний хэргийн анхан шатны шүүхийн шүүгч Сэргэлэнгийн ЭНХБАЯР
Шилдэг прокурор: Баянзүрх дүүргийн прокурорын газрын орлогч прокурор Аяахүүгийн БАЯМБАЦЭЕМАА (Прокурор А.Бямбацэемаа хүндэтгэн үзэх шалтгаанаар ёслолын ажиллагаанд хүрэлцэн ирээгүй бөгөөд түүний шагналыг Баянзүрх дүүргийн Ерөнхий прокурор Ц.Батболд гардаж авав)
Шилдэг өмгөөлөгч: Монголын Хуульчдын холбооны Зөвлөлийн гишүүн, “Монгол өмгөөлөгч” ХХН-ийн партнер Лхагвын ДАНЗАННОРОВ
Шилдэг хуульч эрдэмтэн: Монголын Хуульчдын холбооны гишүүн хуульч, МУИС-ийн Хууль зүйн сургуулийн Нийтийн эрх зүйн тэнхимийн эрхлэгч, доктор (Ph.D)., профессор Должингийн БАЯРСАЙХАН
Шилдэг про боно хуульч: Хуульчдын холбооны Зөвлөлийн гишүүн, “Алтан гэрэгэ” ХХН-ийн өмгөөлөгч Ринзааны БУЛГАМАА
Шилдэг нотариатч: Монголын Нотариатын танхимын Удирдах зөвлөлийн гишүүн, хуульч Чансаагийн ЭРДЭНЭБАЯР
Шилдэг хуулийн зөвлөх: Хуульчдын холбооны зөвлөлийн гишүүн, “ДиБи энд ЖиТиЭс” нөхөрлөлийн ахлах партнер, хуульч Дашнямын ЗОЛЖАРГАЛ
Шилдэг залуу хуульч: Хуульчдын холбооны Захиргааны эрх зүйн хорооны Удирдах зөвлөлийн гишүүн, “Мон Ло” ХХН-ийн гишүүн өмгөөлөгч Өлзийн ЭРДЭНЭ-ОЧИР
Шилдэг өмгөөллийн нөхөрлөл: Өмгөөллийн “ЭмДиЭс ХаанЛекс” нөхөрлөл
Шилдэг хороо: Монголын Хуульчдын холбооны СУРГАЛТЫН ХОРОО тус тус шалгарлаа.
