АНУ-ын Олон Улсын Хөгжлийн агентлагаас “Хөгжлийн Шийдэл” ТББ-тай хамтран "Бизнесийн тогтвортой хөгжлийг сайжруулах, ил тод байдлыг нэмэгдүүлэх BEST хөтөлбөр”-ийг хэрэгжүүлж эхлээд буй.

   “Хөгжлийн Шийдэл” ТББ нь тус хөтөлбөрийн хамтран хэрэгжүүлэгчээр Монголын Хуульчдын холбоог сонгож, өнөөдөр (2020.02.21) харилцан ойлголцлын санамж бичиг үзэглэлээ. Харилцан ойлголцлын санамж бичгийг Монголын Хуульчдын холбооны Ерөнхийлөгч Б.Өнөмөнх, “Хөгжлийн шийдэл” ТББ-ын гүйцэтгэх захирал Б.Хишигсүрэн нар баталгаажуулж, гарын үсэг зурсан бөгөөд санамж бичиг зурах ёслолын ажиллагаанд талуудын удирдах албан тушаалтнууд оролцож, хамтын ажиллагааг хэрхэн үр дүнтэй хэрэгжүүлэх талаар санал солилцсон юм.

   Энэхүү хамтын ажиллагааны хүрээнд талууд жижиг дунд бизнес эрхлэгч, үйлдвэрлэгч, иргэний нийгмийн байгууллага, төрийн байгууллага, албан тушаалтныг чадавхжуулж, төрийн байгууллага, албан тушаалтны үйл ажиллагааг ил тод, нээлттэй болгох, төрийн бус байгууллага, иргэний нийгмийн оролцоо, хяналтыг сайжруулах зорилгоор олон ажлыг хэрэгжүүлэхээр төлөвлөжээ.

   Тодруулбал, жижиг, дунд бизнес эрхлэгчдийн компанийн засаглалын талаарх ойлголтыг нэмэгдүүлэх, засаглалын чиглэлийн сургалт, хэлэлцүүлэг, форум зохион байгуулах юм. Мөн жижиг, дунд бизнес эрхлэгчдийн үйл ажиллагааг дэмжих, санхүүжилтийг хангах чиг үүрэг бүхий төрийн байгууллага, албан тушаалтны сонгон шалгаруулалтын үйл ажиллагаа, санхүүжилтийн ил тод байдалд судалгаа хийж, эрх зүйн орчныг сайжруулах талаар санал боловсруулах, бодлогын нөлөөллийн ажлыг хамтран зохион байгуулахаар тохиролцсон юм.