Монголын Хуульчдын холбооны Зөвлөлийн 2021 оны зургадугаар сарын 05-ны өдрийн хуралдааны шийдвэрээр Хуульчийн мэргэжлийн шалгалтыг 2021 оны есдүгээр сарын 08, 09, 10-ны өдрүүдэд Улаанбаатар хотод зохион байгуулахаар товлосон.

  Энэ хүрээнд Монголын Хуульчдын холбооноос шалгалтын талаар албан ёсны мэдээлэл өгөх зорилгоор өнөөдөр (2021.06.25) хэвлэлийн бага хурал зохион байгууллаа. Хуралд Монголын Хуульчдын холбооны Хуульчийн мэргэжлийн шалгалтын зохион байгуулалтын комиссын гишүүн Ж.Ичинхорлоо, Шалгалтын хороо хариуцсан мэргэжилтэн Б.Бямба-Оюун нар оролцсон.

  Хуульчийн мэргэжлийн шалгалтын бүртгэл 2021 оны зургадугаар сарын 25-ны өдрийн 12:00 цагт эхэлж, 2021 оны наймдугаар сарын 08-ны өдрийн 12:00 цагт дуусах бөгөөд бүртгэлийг https://burtgel.mglbar.mn/ цахим хаягаар явуулна.

  Хуульчийн мэргэжлийн шалгалт нь сорилго, бодлого гэсэн дарааллаар явагдана. Сорилгын шалгалт нь 200 асуултаас бүрдэх бөгөөд үргэлжлэх хугацаа 200 минут, бодлогын шалгалт Иргэний эрх зүй, Захиргааны эрх зүй, Эрүүгийн эрх зүй бодлогын шалгалтаар үргэлжлэх бөгөөд нэг бодлогыг бодох хугацаа 150 минут байх юм.

  Шалгалтад бүртгүүлэх иргэд Хуульчийн эрх зүйн байдлын тухай хууль, Хуульчийн мэргэжлийн шалгалтын журам, Хуульчийн мэргэжлийн дадлагад тооцох журам болон шалгалтад бүртгүүлэх заавартай  www.mglbar.mn, burtgel.mglbar.mn цахим хаягт хандан танилцах боломжтой.

  Сонирхуулахад, Монголын Хуульчдын холбоо нь Хуульчийн мэргэжлийн 6 дахь удаагаа зохион байгуулж байгаа бөгөөд 2020 оны шалгалтад 1340 хүн бүртгүүлснээс 297 нь тэнцсэн.

Холбоо барих: 70116364/Хуульчийн мэргэжлийн шалгалтын хороо хариуцсан мэргэжилтэн/

Хэвлэлийн хурлын бичлэгийг ЭНД дарж үзнэ үү.

МОНГОЛЫН ХУУЛЬЧДЫН ХОЛБОО

 ХУУЛЬЧИЙН МЭРГЭЖЛИЙН ШАЛГАЛТЫН АСУУДАЛ ЭРХЭЛСЭН ХОРОО