ЖАНЛАВЫН БЯМБАЖАВ

/1953-2022/

  Гавьяат хуульч Жанлавын Бямбажав нь 2022 оны хоёрдугаар сарын 02-ны өдөр өвчний улмаас таалал төгсөж, бидэнд нөхөж баршгүй хүнд гарз тохиолдлоо.

  Ж.Бямбажав нь 1953 онд Архангай аймгийн Жаргалант суманд Жанлавын ууган охин болон мэндэлж, 1961-1971 онд бага, дунд сургууль, 1971-1977 онд ОХУ-ын Эрхүүгийн Их сургуулийн хуулийн ангийг тус тус төгсжээ.

  Тэрээр 1977-1986 онд Улсын Ерөнхий Прокурорын газарт хэлтсийн прокурор, тасгийн дарга, 1986-1990 онд Монголын Өмгөөлөгчдийн Коллегийн дарга, 1990-1992 онд Улсын Бага Хурлын гишүүн, 1992-1996 онд УИХ-ын гишүүн, 1996-2002 онд Монгол Улсын Үндсэн хуулийн цэцийн гишүүн, 2002-2012 онд Үндсэн хуулийн цэцийн Тамгын газрын референт, ахлах зөвлөх, 2012 оноос хойш Үндсэн хуулийн цэцийн орон тооны бус зөвлөхөөр ажиллаж байжээ.

  Ж.Бямбажав нь Үндсэн хуулийг сахин хамгаалах, чандлан сахиулах, Үндсэн хуулийн цэцийг бэхжүүлэх үйл хэрэгт мэдлэг боловсрол, хүч хөдөлмөрөө зориулсан шилдэг хуульч байсан билээ.

  Түүний хууль зүйн салбарт оруулсан үнэтэй хувь нэмэр, хөдөлмөр зүтгэлийг нь төр засаг өндрөөр үнэлж, Хөдөлмөрийн хүндэт медаль, Алтан гадас одон, Хөдөлмөрийн гавьяаны улаан тугийн одонгоор, 2022 онд Монгол Улсын гавьяат хуульч цолоор тус тус шагнаж байв.

  Б.Бямбажавын тууштай зүтгэл, бүтээлч хөдөлмөрч зан чанар, элэгсэг дотно дүр төрх нь Монголын Хуульчдын холбооны нийт гишүүн хуульчдын сэтгэл зүрхэнд хоногшин үлдэх болно.

  Талийгаачийн гэр бүл, төрөл төрөгсдөд нь гүн эмгэнэл илэрхийлье.

 МОНГОЛЫН ХУУЛЬЧДЫН ХОЛБОО