УИХ-ын Тамгын газрын Парламентын судалгаа, хөгжлийн хүрээлэн, Монголын Хуульчдын холбооны Эдийн засгийн эрх зүйн хороо, МУИС-ийн Хууль зүйн сургуулийн дэргэдэх Герман, Европын эрх зүйн төв хамтран “ЭДИЙН ЗАСАГ БА ХУУЛЬ ТОГТООМЖИЙН УЛАМЖЛАЛ, ШИНЭЧЛЭЛ, ТУЛГАМДСАН АСУУДАЛ” сэдэвт эрдэм шинжилгээний хэлэлцүүлгийг 2024 оны 10 дугаар сарын 24-ний өдөр зохион байгууллаа.

   Хэлэлцүүлгийг УИХ-ын Тамгын газрын Парламентын судалгаа, хөгжлийн хүрээлэнгийн захирал доктор, профессор Д.Бумдарь нээж үг хэлсэн бөгөөд цаашид хууль тогтоомжийг боловсронгуй болгоход нээлттэй хамтран ажиллахаа илэрхийллээ.

   Хэлэлцүүлгийн үеэр СЭЗИС-ийн Эрх зүйн тэнхимийн ахлах багш Л.Отгонбаяр “Өрсөлдөөний эрх зүй дэх картелийн зохицуулалт: Протекционизмын асуудал” сэдвээр, Монголын Хуульчдын холбооны Эдийн засгийн эрх зүйн хорооны тэргүүн, МУИС-ийн Хууль зүйн сургуулийн багш Б.Баасандорж “Монгол Улс дахь татварын эрх зүйн шинэтгэл: Хэрэглээний татварын дахин хуваарилалтын чиг үүрэг ба НӨАТ-ын зохицуулалт” сэдвээр, МУИС-ийн Хууль зүйн сургуулийн дэргэдэх Герман, Европын эрх зүйн төвийн ахлах судлаач, ахлах багш Б.Батбаяр “Монгол Улс дахь хууль тогтоомжийн төрөлжүүлэлт: түүх ба орчин үе” сэдвээр, МУИС-ийн Хууль зүйн сургуулийн Хувийн эрх зүйн тэнхимийн ахлах багш Л.Банзрагч “Гэрээний үүргийн зөрчлийн улмаас учирсан хохирлыг тодорхойлох эрх зүйн асуудал” сэдвээр илтгэл тавьж, хэлэлцүүлэг өрнүүлж оролцлоо.

   Хэлэлцүүлгийг дүгнэж МУИС-ийн Хууль зүйн сургуулийн дэд профессор, Герман, Европын эрх зүйн төвийн захирал доктор Т.Золбоо хааж үг хэлсэн бөгөөд МУИС-ийн Хууль зүйн сургуулийн дэргэдэх Герман, Европын эрх зүйн төвийг үйл ажиллагааг танилцуулж, хамтран идэвхтэй ажиллахаа илэрхийллээ.

   Тус хэлэлцүүлэгт УИХ-ын Тамгын газар, Татварын Ерөнхий газар, Монополын эсрэг газар зэрэг төрийн байгууллагын төлөөлөл, практикт ажиллаж буй төрийн захиргааны байгууллагын албан хаагчид, улсын байцаагчид, их дээд сургуулийн судлаач багш, эрдэмтэд, компанийн хуулийн зөвлөх, комплайнсын мэргэжилтэн, хуульч, өмгөөлөгч зэрэг 70 орчим хүн идэвхтэй оролцож, санал солилцлоо.

   Хэлэлцүүлгээр судлаачдын судалгааны үр дүнг дэмжиж, тулгамдсан асуудлуудыг чөлөөтэй ярилцсан бөгөөд Монголын Хуульчдын холбооны Эдийн засгийн эрх зүйн хорооны зүгээс энэ чиглэлийг хэлэлцүүлгүүдийг тогтмол зохион байгуулахад анхаарч ажиллахаа илэрхийлсэн.