Монголын Хуульчдын холбооны Иргэний эрх зүйн хорооноос жил бүр хууль зүй их, дээд сургуулийн оюутнуудын дунд хувийн эрх зүйн тодорхой асуудал хөндсөн сэдвээр эрдэм шинжилгээний илтгэлийн уралдаан зарлаж дүгнэдэг уламжлалтай. 2025 оны оюутны эрдэм шинжилгээний илтгэлийн уралдааныг “Төрийн болон орон нутгийн өмчийн эрх зүйн зохицуулалтын зарим асуудал” сэдвийн хүрээнд зохион байгууллаа.

Илтгэлийн уралдааны хоёрдугаар шатанд МУИС-ийн Хууль зүйн сургууль, Дотоод хэргийн их сургууль, Шихихутуг их сургууль, Санхүү, эдийн засгийн их сургууль, Их засаг их сургуулийн оюутнуудын илтгэлүүд шалгарсан бөгөөд шалгарсан илтгэлүүдийг 2025 оны тавдугаар сарын 2-ний өдөр хэлэлцүүлж шилдгүүдийг тодрууллаа. Хоёрдугаар шатны шалгаруулалтын шүүгчээр Баянзүрх, Сүхбаатар, Чингэлтэй дүүргийн иргэний хэргийн анхан шатны тойргийн шүүхийн шүүгч Н.Оюунтуяа, “Эрдэнэс монгол” ХХК-ийн Нэгдлийн хууль, эрх зүйн зөвлөлийн дарга Б.Гэрлээ, хуульч, өмгөөлөгч Э.Удвал, өмгөөллийн "Легал гайд" хуулийн фирмийн партнер Э.Эрдэнэхишиг нар ажиллаж шилдэг илтгэлийг тодрууллаа. Үүнд:

1 дүгээр байранд Санхүү, эдийн засгийн их сургуулийн Бизнесийн эрх зүйн хөтөлбөрийн IV дамжааны оюутан А.Азжаргал, Э.Оюунбилэг нар “Үндсэн хуулийн 6.2 дахь заалтын зарим агуулгыг тайлбарлан хэрэглэх асуудал” илтгэлээр,

2 дугаар байранд МУИС-ийн Хууль зүйн сургуулийн IV  түвшний оюутан Ч.Цэрэнчимэд, Б.Өсөхбаяр нар “Төрийн болон орон нутгийн өмчийн эрх зүйн зохицуулалтын зарим асуудал” илтгэлээр;

3 дугаар байранд МУИС-ийн Хууль зүйн сургуулийн IV түвшний оюутан Б.Өсөхбаяр, Б.Мөнхцэцэг нар  “Төрийн өмчит компани дахь өмчлөгчийн хяналт, онцгой дэглэм тогтоох асуудлын хүрээнд” илтгэлээр тус тус шалгарлаа.

Тус илтгэлийн уралдааны дэмжигчээр өмгөөллийн "Легал гайд" хуулийн фирм оролцож, илтгэл хэлэлцүүлсэн оюутнууд болон шүүгч нарт ном дурсгав.