Монголын Хуульчдын холбоо, Ханнс-Зайделийн сан хамтран “ХҮҮХДИЙН ХЭРГЭЭР ХУУЛЬЧДЫГ МЭРГЭШҮҮЛЭХ ТОГТОЛЦОО” сэдвээр өчигдөр (2026.03.24) чөлөөт уулзалт, ярилцлага зохион байгууллаа.

Тус уулзалт, ярилцлагын зочин илтгэгчээр ХБНГУ-ын Пассау хот дахь Прокурорын газрын Хүүхдийн хэргийн прокурор Юлья Шахербауэр оролцож, өөрийн туршлага, мэдлэгийг хуваалцав. Тэрбээр өсвөр насныхны гэмт хэрэг, оршин суух болон орогнолын хуультай холбоотой зөрчил, гэр бүлийн болон ойрын хүрээний хүчирхийлэл, мөшгөх, мөн хүчирхийллээс хамгаалах тухай хуулийн зөрчлийн хэргүүдийг хариуцан ажилладаг байна.

Хатагтай Юлья Шахербауэр уулзалтын үеэр хүүхэд болон хохирогчийн эрхийг хамгаалах олон улсын стандартыг үндэсний эрүүгийн эрх зүйд хэрэгжүүлэхэд шүүх, прокурор, цагдаагийн байгууллагын гүйцэтгэх үүргийн талаар дэлгэрэнгүй танилцууллаа. Түүнчлэн НҮБ-ын Хүүхдийн эрхийн конвенцод тусгагдсан хүүхдийн эрх, хамгаалалт, ашиг сонирхлыг нэн тэргүүнд тавих зарчмын ач холбогдлыг дурдав. Мөн тэрбээр хүүхдэд ээлтэй байцаалтын арга барилын талаар танилцуулж, эрүүгийн болон иргэний хэрэг хянан шийдвэрлэх ажиллагаанд хүүхдийн нас, хөгжлийн онцлог, хамгааллын хэрэгцээг харгалзан үзэх нь хүүхдийг дахин сэтгэлзүйн дарамтад оруулахгүйгээр үнэн зөв мэдүүлэг авахад чухал ач холбогдолтойг онцоллоо.

Энэхүү чөлөөт уулзалтын өмнө Монголын Хуульчдын холбооны Ерөнхийлөгч М.Мөнхбат, Тамгын газрын дарга Ш.Жолбас нар Хатагтай Юлья Шахербауэрыг хүлээн авч уулзсан бөгөөд цаашид тус сэдвээр хуульчдыг мэргэшүүлэх чиглэлээр хамтран ажиллахаар ярилцсан.