2013 оны 9 дүгээр сарын 9

Хуульчдын анхдугаар Их хурлын эхний хэсэг 2013 оны 9 дүгээр сарын 06-08-ны өдрүүдэд Төрийн ордонд амжилттай зохион байгуулагдлаа.

Хурлын эхний хэсгээр Монголын Хуульчдын холбооны дүрмийг баталж, холбоог үүсгэн байгуулах, гишүүний татварын хэмжээг тогтоох,  Холбооны ерөнхийлөгчийг сонгох, “Хуульчийн мэргэжлийн үйл ажиллагаанд баримтлах дүрэм”-ийг батлах зэрэг асуудлыг хэлэлцэж шийдвэрлэхээр төлөвлөөд байсан юм.

Их хурал хэлэлцэх асуудлуудаас “Хуульчийн мэргэжлийн үйл ажиллагаанд баримтлах дүрэм”-ээс бусад асуудлуудаа эцэслэн шийдвэрлэсэн байна.

Их хурлын төлөөлөгчид “Хуульчийн мэргэжлийн үйл ажиллагаанд баримтлах дүрэм”-ийн төсөлийн хүрээнд нилээд олон санал хэхэлцүүлгийг явуулсны эцэст дүрмийн төсөлд зарим нэгэн өөрчлөлтүүдийг тусгах, нийт хуульчдаар дахин хэлэлцүүлэх зэрэг ажлыг хийсний дараа 2013 оны 10 дугаар сарын 05-06-ны өдрүүдэд хуралдах Их хурлын дараагийн хэсгийн хуралдаанаар эцэслэн батлахаар тогтжээ.

Ийнхүү хуульчдын холбоо байгуулагдсанаар хуульчийг сонгон шалгаруулах, хуульчийн үргэлжилсэн сургалтыг зохион байгуулах, хуульчийн Мэргэжлийн хариуцлаг, ёс зүйтэй холбогдсон маргааныг хянан шийдвэрлэх, хууль зүйн их дээд сургуулийг магадлан итгэмжлэх зэрэг төрийн хэрэгжүүлдэг байсан чиг үүргийг хуульчдын өөрөө удирдах байгуулгад шилжүүлэх үйлажиллагаа бодитоор хэрэгжиж эхэллээ.