2013 оны 10 дугаар сарын 21

    Хуульчдын холбооны зөвлөлийн анхны ээлжит бус хурал 2013 оны 10 дугаар сарын 19-нд боллоо.

 Хуульчийн эрх зүйн байдлын тухай хууль болон Холбооны дүрэмд зааснаар Зөвлөл нь Хуульчдын холбооны өдөр тутмын үйл ажиллагааг удирдлагаар хангах, бодлогыг тодорхойлох чиг үүрэгтэй хамтын удирдлагын байгууллага юм. 

    Хурлаар Хуульчдын холбооны зөвлөлийн хурлын үйл ажиллагаа, хурлын дотоод дэгийг тогтоох асуудлын хүрээнд Монголын Хуульчдын холбооны дүрмийн 4.9 дүгээр зүйлийн 3 дахь заалтыг үндэслэн "Монголын Хуульчдын холбооны зөвлөлийн ажиллах журам”-ын төслийг хэлэлцэж, батлав. Мөн Монголын Хуульчдын холбооны 2013 оны дөрөвдүгээр улирлын ажлын төлөвлөгөө,  Хуульчдын холбооны Тамгын газрын болон мэргэжлийн хариуцлагын хорооны бүтэц, орон тоог баталж, ажилтны цалингийн хэмжээг тогтоолоо. Энэ үеэр Хуульчдын холбооны Тамгын газрын даргыг томилох асуудлыг хэлэлцэн шийдвэрлэж, хуульч Б.Энх-Амгаланг даргаар томилов.  Түүнчлэн Хуульчдын холбооны зөвлөлөөс нэн даруй батлах шаардлагатай журмын төсөл боловсруулах ажлын хэсгийг байгуулж, бүрэлдэхүүнийг томилох эрхийг Ерөнхийлөгчид олгохын зэрэгцээ холбооны чиг үүргийн хороодыг байгуулах бэлтгэл ажлын хүрээнд ажлын хэсэг байгуулан ажиллуулахыг Ерөнхийлөгчид даалгав.