2014 оны 1 дүгээр сарын 13
Хуульчдын холбооны зөвлөлийн 2014 оны нэгдүгээр сарын 11-ний өдрийн хурлаар Хуульчийн үргэлжилсэн сургалт зохион байгуулах, багц цаг тооцох журмыг баталлаа. Тус журмаар хуульч жил бүр дөрвөөс доошгүй багц цагийн сургалтад хамрагдсан байх бөгөөд нэг нь мэргэжлийн суурь, гурав нь мэргэшүүлэх чиглэлийн сургалт байхаар заажээ.
Мөн тус өдрийн хурлаар Хуульчдын холбооны гишүүний татварын журмыг хэлэлцэн, баталсан бөгөөд нэг жилээс дээш хугацаагаар гадаад улсад суралцах, ажиллахаар болсон, эсхүл бага насны хүүхэд, хүнд өвчтэй гэр бүлийн гишүүн, хамаатан садангаа зургаан сараас дээш хугацаагаар асрахаар болсон тохиолдолд гишүүний татварыг нэг жил хүртэлх хугацаанд 50 хувиар бууруулахаар тусгасан байна. Мөн эрүүл мэндийн улмаас хуульчийн мэргэжлийн үйл ажиллагаа эрхлэх боломжгүй болсон тохиолдолд татварын хөнгөлөлт үзүүлэхээр журамлав.
