2014 оны 4 сарын 8

Монголын Хуульчдын холбооны Өмгөөлөгчдийн хороо, Монголын өмгөөлөгчдийн холбоо хамтран “Өмгөөлөгчийн мэргэжлийн нэр хүнд” сэдэвт дугуй ширээний ярилцлагыг дөрөвдүгээр сарын 4-нд Монголын Хуульчдын холбооны байранд зохион байгууллаа. Өмгөөлөгчийн мэргэжлийн нэр хүндийг дээшлүүлэх,  тэдний мэргэжлийн нэр хүндэд нөлөөлөх хүчин зүйлсийг тодорхойлох,  нэр хүндэд муугаар нөлөөлж байгаа зүйлийг шүүн тунгааж санал солилцож,  цаашид бодитой арга хэмжээ авч ажиллах зорилготой уг уулзалтад Хуульчдын холбооны Өмгөөлөгчдийн хорооны дарга З.Сүхбаатар, Өмгөөлөгчдийн холбооны ерөнхийлөгч Б.Ганбаатар, Нийслэлийн өмгөөлөгчдийн зөвлөлийн тэргүүн Ж.Батзоригт болон өмгөөлөгчдийн төлөөлөл оролцов. Уулзалтын эхэнд Өмгөөлөгчдийн хорооны дарга З.Сүхбаатар “Бид бугшсан асуудлаа яриад өнгөрөх биш, шат дараатай боломжит ажлуудыг хийхийг зорьж байна. Бидний жижигхэн гэж эс тоодог зүйл алсдаа хүний эрх, бидний мэргэжлийн зохион байгуулалттай хүртэл холбогдох нь бий. Тиймээс энэ бүхнийгээ сайжруулах, анхаарал хандуулах нь чухал” гэдгийг онцоллоо.

Уулзалтын хүрээнд “Өмгөөлөгчийн мэргэжлийн бэлтгэл ба мэргэжлийн нэр хүнд”, “Өмгөөлөгчийн биеэ авч явах байдал ба мэргэжлийн нэр хүнд”, “Өмгөөлөгч өөрийгөө илэрхийлэх байдал ба мэргэжлийн нэр хүнд”, “Шүүхэдтөлөөлөх эрхгүй этгээдүүдийн үйл ажиллагаа ба өмгөөлөгчийн мэргэжлийн нэр хүнд” гэсэн дөрвөн сэдвийг хэлэлцүүлж, оролцогчдын саналыг сонсов.

Дашрамд сонирхуулахад, Монголын Хуульчдын холбооны Өмгөөлөгчдийн хорооноос “Өмгөөлөгчийн ажиллах орчин” сэдэвт хэлэлцүүлгийг өнгөрсөн гуравдугаар сарын 21-нд зохион байгуулсан билээ. Энэ хэлэлцүүлгээр өмгөөлөгчдийн ажлын байдал, ажиллах орчин, стандарт нь ямар байх талаар ярилцаж, санал гарган холбогдох байгууллагуудад хүргүүлсэн юм. Тэгвэл удахгүй өмгөөлөгчийн эрх үүргийн асуудлаар ээлжит хэлэлцүүлэг зохион байгуулахаар төлөвлөөд байна.