Монголын Хуульчдын холбоо, Цагдаагийн ерөнхий газар, Монгол Улсын Шинжлэх ухааны академи хамтран “Гэмт хэрэгтэй тэмцэх, урьдчилан сэргийлэх үйл ажиллагаанд шинжлэх ухаан, инновац нэвтрүүлэх боломж, шийдэл” сэдэвт хэлэлцүүлгийг өчигдөр /2026.05.07/ зохион байгууллаа.

Тус хэлэлцүүлэг нь гэмт хэрэгтэй тэмцэх, урьдчилан сэргийлэх үйл ажиллагаанд шинжлэх ухаан, судалгаа, инновацын ололтыг бодлого, практикт нэвтрүүлэх, хиймэл оюун ухаан, өгөгдөлд суурилсан шийдлийг хууль сахиулах ажиллагаанд ашиглах, эрдэм шинжилгээний байгууллага, судлаачдын хамтын ажиллагааг бэхжүүлэх ач холбогдолтой байлаа.

Тус хэлэлцүүлэгт эрдэм шинжилгээ, судалгааны байгууллагын төлөөлөл, эрдэмтэн судлаачид, цагдаа, дотоодын цэргийн байгууллагын алба хаагчид оролцож, судалгаа, шинжлэх ухаанд суурилсан бодлого, шийдлийг практикт нэвтрүүлэх чиглэлээр хамтын ажиллагааны чиглэлээ тодорхойллоо.

Хэлэлцүүлгийн үеэр орчин үеийн гэмт хэргийн нөхцөл байдал, технологийн дэвшилд тулгуурласан урьдчилан сэргийлэх арга зам, инновацын хөгжлийн чиг хандлагын талаар эрдэмтэн, судлаачид илтгэл танилцуулж, санал солилцсон юм.