Монголын Хуульчдын холбооны Үндсэн хуулийн эрх зүйн хорооны гишүүн, Дотоод хэргийн их сургуулийн Эрх зүй, нийгмийн ухааны сургуулийн Нийтийн эрх зүйн тэнхимийн дэд профессор Т.Азжаргалын “Үндсэн хуулийн амин сүнс: хариуцлага, онол, үзэл баримтлал, хэрэглээ” номын нээлт өчигдөр боллоо.

Номын нээлтийг Монголын Хуульчдын холбооны Ерөнхийлөгч П.Одгэрэл нээж, баяр хүргэн, цаашдын эрдэм судлалын ажилд нь амжилт хүссэн бөгөөд энэхүү үйл ажиллагаанд "Чингис хаан” тэргүүн зэргийн одонт, академич С.Нарангэрэл тэргүүтэй эрдэмтэн судлаачид оролцож мялаалгын үг айлдсан. 

Зохиогч нь тус бүтээлийг 2013 оноос хойших нийт 12 жилийн хугацаанд тасралтгүй хийсэн эрдэм шинжилгээ, судалгааны ажлын үр дүнд түшиглэн бичиж нийтийн хүртээл болгожээ. Энэхүү бүтээлээр Үндсэн хуулийн эрх зүйн хариуцлагыг Үндсэн хуулийн эрх зүйн шинжлэх ухааны институт болох талаас нь судалж онолын болон практик хэрэглээ түүний арга зүйг тодорхойлсноороо онцлог байна. Түүнчлэн тус бүтээл нь Үндсэн хуулийн эрх зүйн хариуцлагын илрэх хэлбэр, санкц, хариуцлага хүлээлгэх нөхцөл байдал, үндэслэл, арга хэлбэр, хэрэгжүүлэх журам, үндсэн хуулийн зөрчил, үндсэн хуулийн субьектийн гэм буруугийн асуудал, хариуцлагаас чөлөөлөх нөхцөл байдал болон халдашгүй байдлыг үндсэн хуулийн эрх зүйн шинжлэх ухааны онол, арга зүйд тулгуурлан нэг сэдэвт бүтээлийн хэмжээнд нарийвчлан судалсан судалгааны үр дүн, олон жилийн хөдөлмөр ажээ.